Mostrando entradas con la etiqueta piñán. Mostrar todas las entradas

Este cuento pertenece al volumen "La tierra entero" publicado en 1996.

—¿Qué tal, cielo?
—Hola, Fran, llevo un ratu esperando.
—Joder, nun tenía ónde aparcar, nun quedrás que dexe'l coche tiráu nuna cuneta.
—Non, si yá lo sé, primero déxemes a mí tirada.
—Venga, nun digas tochaes, nun vengas agora con que tienes celos del coche.
—Pues a veces pienso que te preocupes más d'él que de mí.
—Anda, Mila, déxalo yá ¿non? Hai un tarde preciosa. Vamos tener la fiesta en paz, ¿eh currina?
—Ta bien, ta bien...nun digo nada.
—Hai una tarde total, ¿eh?, ¡joder!, si casi se pue dir a cuerpu, ta de puta madre.
—Sí, ta guapo.
—Anímate, muyer, que paez que tas nun funeral.
—Non, si yá toi animada.
—Entós, ¿qué?, ¿vamos al cine?
—Nun sé, la verdá... cásique prefería quedar per equí, nun sé...
—¡Pero si siempre vamos al cine!
—Ya..., por eso, prefería nun dir.
—Joder, tas de nones, tía, ¿y pue sábese entós qué quies facer?
—Nun sé..., podíemos tomar daqué y charrar un pocuñín.
—¿Y de qué quies que falemos?
—Pues de nosotros. Depués de too vamos casar d'equí a nada y nun sé, chico, nunca falamos.
—¿Cómo que nunca falamos? ¿Cómo que nunca falamos? Nun t'entiendo, Mila, de verdá, nun t'entiendo. Llevamos cuantísimo xuntos y agora, precisamente agora, sálesme con estes, joder, tía, yes más rara que la tos.
—Pero si yo namas quería falar, que nos contáramos les nuestres coses y eso.
—Ah, non, comigo nun cuentes pa cursileríes de muyeres, yá sabes cómo soi ¡joder! Vamos casar y puntu. ¿Y sabes lo que te digo? ¡Que lo demás son mariconaes!
—Va, Fran, nun te pongas asina, tío. Y, ¡jo!, nun me llevantes la voz que va enterase tol chigre.
—Ye que, chica, traes de cada cuentu que ma cago na mar... pero venga, ala, venga, ¡fala de lo que coño quieras!
—Non, si nesti plan...
—Mira, Milagros, yo creo que llevamos falao abondo, inclusive por demás, que total, qué coño más me dan a min les histories coles qu'andes siempre.
—Pero ¿qué histories dices?
—¡Da igual, toes! Les de la to amiga Marga, por exemplu.
—Pero Fran, Marga ye la mió meyor amiga...
—Sí, sí, pero ye más babaya qu'un llimaz.
—Joder, tío, nun entiendo por qué te mietes agora con ella, ¿qué te fixo a tí, eh? Di, ¿qué te fixo?
-¿A min?¿A min? Nun tien falta faceme esa nada pa ver lo plombu que ye y el culu de pantorta que tien.
—Joder, Fran, yes un borde y un insensible y un..., y un...
—¿Un qué? Venga, dilo, dilo... ¿Un qué?
-...
—Anda, nun llores muyer, que va vete tol mundu.
-...
—Venga, Mila, que ya falamos agora de lo que tu quieras, muyer.
-...
—Vaya, nun seyas fata, ho, vamos tomar daqué y charrar tranquilamente. ¿Quies una caña?
-...
—Anda, Milagrinos, toma una cañina comigo, yá verás cómo se te pasa'l disgustu... Venga, vamos falar un ratadín de lo que tú quieras, ho...
-...
—Umm...
-...
—¿Nun quies dir al cine, eh?
-...
—Non, claro, paezo fatu, colo tarde que ye. Venga, toma una cañina, ¿quies unes aceitunes?
-...
—Joder, mira, son casi les nueve y tovía ye de día.
-...
—En fin, nun sé, podemos falar de lo que quieras... ¿Qué te parez si-y cambio el tubu escape al coche, eh?
-...
—¿Eh?
—Parezme que te vayas a la mierda.
—...Yá.

Hoy es el "Día de les Lletres Asturianes". Hoy la escritora Berta Piñán tomará posesión como nuevo Miembro de Número de L'Academia de la Llingua Asturiana en reconocimiento a la enorme contribución literaria que ha hecho en el proceso de recuperación lingüística en Asturias.

¿Cómo se diz en uolof la palabra frontera, la palabra patria? ¿Y en soniké? ¿Cómo-y llamáis al desamparu? Si queréis dicir en bereber, por exemplu, “yo tuvi una casa nun arrabal de Rabat” ¿ponéis nesti orde la frase? ¿Cómo se conxuguen en bambara los verbos que lleven al norte, qué axetivos-y cuadren a la palabra mar, a la palabra muerte? Si tenéis que marchar, ¿ye la palabra adiós un sustantivu? ¿Cómo se pronuncia en diakhanké la palabra exiliu? ¿Hai que xuntar los llabios? ¿Duelen? ¿Qué pronomes usáis pal qu’espera na playa, pal que regresa ensin nada? Cuando señaláis p’allá, pa contra casa, qué alverbiu escoyéis? ¿Cómo se diz na vuestra, na nuestra llingua la palabra futuru?

San Antolín de Beón
Qué extraña, absurda materia la poesía:
desvela con esmeru las tenebres del alma
y nun acierta a falar del color exactu
que'l mar dexa esta tarde nos tos güeyos.


Llectura na playa o mares de tinta
El mar altivu de Simbad, el mar d'Ulises,
el mar d'Al-Mutanabbi, calmu y mansulín
como fiera adondada, el mar d'Eneas,
el de Byron, l'azul imposible de Withman,
de Kavafis, el mar de tinta que cuerre nos
sos versos, nun me dexó contemplar el mar
esta mañana.

Pa otros l’aventura, los viaxes, l’anchor

del océano, Roma ardiendo y les pirámides,

les selves inomables, la lluz de los desiertos,

los templos y el rostru de la diosa. Pa ellos

rascacielos y ciudaes, palacios del suañu

contra’l tiempu, la sorrisa de Buda, les torres

de Babel, los acueductos, la industria incesante

del home y los sos afanes.

A min dexáime la solombra difusa del carbayu,

la lluz dalgunos díes de seronda, la música callada

de la nieve, el so cayer incesante na memoria,

dexáime les zreces na boca cuando nena, la voz

de los amigos, la voz del ríu y esta casa, dalgunos llibros,

pocos, la mio mano dibuxando, a modo, la curvatura

perfecta del to llombu.