Selmana de les Lletres Asturianes

Posted by Arabella in , ,

La Selmana de les Lletres Asturianes vien celebrándose dende 1980 na primer selmana del mes de mayu, y dende 1989 solía tar consagrada a un autor o autora importante de la lliteratura asturiana, si bien la XXVI Selmana de les Lletres (2005) ruempe con esta tradición al tar dedicada a la Poesía (Col títulu de Poesía en Movimientu), daqué que se caltuvo tamién nel 2006, añu nel que tuvo dedicada al Teatru (col títulu de Teatru a Escena).

La Selmana de les Lletres carauterízase por ser una fecha señalada pa munches instituciones y estayes estremaes. Asina, los profesores de llingua y lliteratura asturiana acostumen a adaptar les sos clases al autor al que tea dedicada la selmana (o a la manifestación lliteraria nel so casu), y les autoridaes autonómiques implíquense na defensa del idioma. Asina ye que dende los caberos años vienen celebrándose recitales de poesía na Xunta Xeneral o repartos de llibros o DVDs de baldre.

Amás de los munchos recitales de poesía y actos culturales que se celebren per toa Asturies nesta selmana, destaca nella'l Día de les Lletres, que ye'l momentu cimeru de la selmana nel que la presidencia de l'Academia de la Llingua Asturiana da'l so discursu nun actu solemne zarráu pol Himnu d'Asturies nel qu'evalúa la situación xeneral de la llingua y la lliteratura y procédese al nomamientu de los nuevos académicos o académiques. Tamién ye esti día l'escoyíu polos comerciantes llibreros pa facer un 10% de descuentu nos sos llibros, celebrándose n'Uviéu la Feria del Llibru que va dende'l Día del Llibru (23 d'abril) al Día de les Lletres (tamién llamáu Día del Llibru y del Discu n'asturianu). Asinamesmo, la Xunta pola Defensa de la Llingua Asturiana suel entamar una manifestación pola oficialidá del asturianu coincidiendo col Día de les Lletres.

Motivos delles celebraciones de la Selmana de les Lletres fasta'l momentu:
* 1980 - 88 Ningunu
* 1989 Xosé Caveda y Nava
* 1990 Teodoro Cuesta
* 1991 Llorienzu Novo Mier
* 1992 Pepín de Pría (José García Peláez)
* 1993 Fernán Coronas (Padre Galo Fernández)
* 1994 Antón el Chiova (Valentín Rodríguez Ochoa)
* 1995 Xuan María Acebal
* 1996 Marcos del Torniello (José Benigno García González)
* 1997 Manuel Fernández de Castro
* 1998 Xosefa Xovellanos
* 1999 Constantino Cabal
* 2000 Antón de Marirreguera
* 2001 Pachín de Melás
* 2002 María Josefa Canellada
* 2003 Antonio García Oliveros
* 2004 Andrés Solar
* 2005 Poesía Asturiana Contemporanea
* 2006 Teatru Asturianu Contemporaneu
* 2007 Narrativa Asturiana Contemporanea
* 2008 Mª Teresa González
* 2009 Enriqueta González Rubín

This entry was posted on 04 mayo 2009 at 21:48 and is filed under , , . You can follow any responses to this entry through the comments feed .

0 comentarios

Publicar un comentario